Bosveld patats met Amarula

Uiteindelik het ek weer tyd om te blog! Hierdie jaar was een van my besigste nog en ek het vinnig besef dat hierdie blog storie iets is waarvoor mens baie tyd moet hê. Die resepte het opgegaar en nou het ek sommer baie lekker dinge om weer met julle te deel.

Ek is verbaas met hoeveel daar in 'n enkele jaar kan gebeur. Eerstens kan ek met trots aankondig dat ek my vierdejaar van veeartsenykunde geslaag het en nou net nog twee jaar se studies oor het. My een dosent spot dat ons nou al maar die dokter titel met 'n klein lettertjie 'd' voor ons name mag begin byvoeg. Ek het hierdie jaar ook 'n swaer ryker geword en die gewig van my eerstejaarsindroom afgeskud. En dan het my pa ook vir ons die mooiste plaas gekoop in die Waterberge, tussen Vaalwater en Nylstroom. Dit is ons eie stukkie paradys! My pa het groot geword op 'n plaas wat verkoop is toe hy tien was, en van toe af droom hy al om eendag sy eie stukkie grond te hê. Dis nou veertig jaar later en uiteindelik kan my pa sy groot droom leef. Nodeloos om te sê, ons spandeer nou elke oomblik wat ons moontlik kan daar!

Dis daaroor dat ek besluit het om sommer eerste my bosveld patats met Amarula met julle te deel. Dit is een van ons gunstelinge saam braaivleis. Ek kan belowe dat hierdie altyd 'n treffer gaan wees.

Benodighede: 

Patats
Amarula
Bruinsuiker
Botter
Foelie

Metode:

Sny die patats in skywe en pak dit in lae op 'n vel foelie. Ek verkies om die skil aan te hou omdat dit baie mooi lyk as die patats gaar is. Voeg die botter, bruinsuiker en Amarula by na smaak (moenie skaam wees nie). Maak die foelie mooi toe en sit dit op medium-warm kole vir 35-40 minute tot gaar.

Ouma Judy se guava-jellie

Ek is ongelooflik opgewonde om hierdie resep met julle te deel! Dit het behoort aan my liefste Ouma Judy. Ek onthou hoe ons in my kinderdae vir haar op Ohrigstad gaan kuier het en sy dan met bokse koejawels in haar kombuis gestaan het. Sy het ons nooit huistoe gestuur sonder ten minste een van haar bottles jellie nie, en dan het ons dit maar baie spaarsamig gebruik tot ons weer kon gaan kuier. My ouma was ongelooflik goed in die kombuis, ek wonder soms of dit nie dalk is waar my liefde vir bak vandaan kom nie. Sy het in haar laaste paar jaar so 10 minute se ry van ons kampus af gebly, so ek kon weekliks gou gaan inloer en dan het ek altyd gesukkel om daar weg te kom want ons kon net  nie ophou gesels nie. My ouma is verlede jaar oorlede en ons planne dat sy moes kom kuier en my stap-vir-stap verduidelik hoe om hierdie jellie te maak het ongelukkig nooit gerealiseer nie.

Ek wag al ‘n jaar vir koewjawels om in die winkels te kom sodat ek hierdie resep kan uittoets. Ek het nog nooit so baie gewens dat daar selfone in die Hemel was soos hierdie naweek nie, want jellie kook is baie harde werk! Alhoewel my guava-jellie seker nooit by my ouma sn sal kom nie is hierdie is ‘n resep wat ek eendag as ek self ‘n oumatjie nog sal maak.

Bestanddele: (Genoeg vir ongeveer 1 liter jellie)

2.5kg koejawels

Water

Ongeveer 4 koppies suiker

Metode:

Maak seker dat die koejawels wat jy koop nie oorryp is nie. Dit is belangrik dat die koejawels baie pektien en suur bevat en daarom werk voorryp vrugte die beste.

Sny die puntjies van die koejawels af en sny hulle dan op in stukkies. Gooi dit in ‘n groot kastrol saam met die water. Gebruik een koppie (250ml) water vir elke 500g vrugte. Kook dit vinnig teen ‘n hoë temperatuur vir 22-25 minute.

Gebruik nou ‘n klam flenniedoek om die sap te onttrek. Jy kan ook ‘n groot draadsif met twee lae kaadoek oortrek en ‘n lagie watte tussen die twee lae pak. Ek het hier my flenniedoek oor ‘n groot kastrol getrek en dit met ‘n toutjie styf vasgebind. Gooi die kokende vrugte op die doek sodat dit stadig deurdrup. Hier moet jy nou geduldig wees, gooi vir jou ‘n glasie wyn, gryp ‘n goeie boek en los die vrugte vir 3 ure om te dreineer. Moet op geen stadium die vrugte roer of deurdruk nie want dit sal jou jellie ‘n wolkerige kleur maak.

Skep dan versigtig die vrugte van die doek af en verwyder die doek. Meet die hoeveelheid sap wat jy het. Voeg een koppie suiker by vir elke koppie sap en verhit die sap op die stoof sodat die suiker smelt en ‘n stroop vorm.

Suig die stroop deur ‘n klam flennielap om die onsuiwerheid van die suiker uit die stroop te kry. Plaas dan die stroop op die stoof en laat dit tot ‘n jellie kook. Dit is belangrik dat jou jellie baie vinnig kook en dat jy dit gladnie moet roer nie. My jellie het vir ongeveer 12 minute gekook tot dit reg was. Jou jellie is reg wanneer dit stadig van ‘n lepel af loop of wanneer jy dit op ‘n piering laat drup. Jy kan ook die jellie met jou vinger aanvoel sodra dit afgekoel het.

Maak seker dat die bottels wat jy gaan gebruik is skoon en steriel is. Vul 'n kastrol met met koue water ongeveer 5 cm diep en plaas jou bottels en deksels in die water. Plaas die kastrol in 'n warm oond en laat die bottels kook vir ongeveer 10 minute. Vul hulle sodra jy hulle uit die oond haal.

Bedien met warm brood en botter.

Nutella truffels

Hierdie is van die lekkerste truffles wat ek nog geproe het. Ek sukkel altyd om met sjokolade te werk omdat dit by kamertemperatuur smelt nadat ek dit gebruik het om iets te versier. Ek het bietjie opgelees en op 'n artikel afgekom waar hulle op 'n baie moeilike manier eers iets van vetmolekules en verbindings verduidelik en dan uiteindelik verduidelik hoe jy dit reg kan kry om die sjokolade waarin jy jou truffles doop gestol te hou by kamertemperatuur. Dit maak alles sommer baie makliker want dan hoef jou truffles nie die hele tyd in die yskas te staan nie, of dan kan jy selfs dit in boksies verpak vir geskenkies.

Ek sal voorstel dat jy die tutoriaal kyk voordat jy hierdie resep uittoets. Hierdie resep lewer ongeveer 30 truffles en kan vir 7 dae in 'n lugdigte houer of tot 30 dae in die vrieskas gestoor word.

Bestanddele:

280g donkersjokolade
⅓ koppie room
½ koppie Nutella
200g donker/melksjokolade om die truffles in te doop
50g gekapte neute vir versiering (opsioneel)

Metode:

Rasper die donkersjokolade en gooi dit in 'n mengbak. Maak nou die room warm in die mikrogolf, maak seker dat dit nie kook nie. Gooi dan die room oor die sjokolade en meng dit goed sodat al die sjokolade smelt en 'n gladde mengsel vorm. Voeg nou die Nutella by en meng dit goed deur. Bedek die mengbak met kleefplastiek en plaas dit in die yskas vir ongeveer 2 ure om te stol.

Bedek nou 'n bakplaat of skinkbord met waspapier en laat eenkant. Haal die mengsel uit die yskas en skep balletjies van ongeveer 1 teelepel groot daaruit en plaas dit op die bakplaat. Hiervoor het ek sommer die dingetjie gebruik waarmee my ma altyd balletjies uit waatlemoen skep. Jy kan ook die balletjies vorm deur dit in jou handpalms te rol. Plaas die balletjies terug in die yskas vir 15 minute.

Smelt die sjokolade in die mikrogolf. Volg die instruksies in die tutoriaal waarvan ek bo gepraat het. As jy nie 'n termometer het nie, verhit die sjokolade en meng dit na elke paar sekondes om te toets. Die sjokolade is reg as dit effens brand as jy dit teen die onderkant van jou lip laat raak. Koel dan jou sjokolade af soos wat hulle sê deur oorblywende sjokolade by te meng. Die temperatuur is dan reg as die sjokolade effens koeler as liggaamstemperatuur is wanneer dit aan jou onderlip raak. Maak gebruik van 'n vurk om die truffle balletjies een-een in die sjokolade te doop, tik die vurk liggies teen die kant van die bak om die oortollige sjokolade af te skud en plaas dan die balletjie op die bakplaat om te stol. Moenie die balletjies in die yskas plaas nie. (Tensy jy nie my metode gevolg het om die sjokolade te smelt nie.)

As al jou balletjies bedek is met sjokolade en gestol het kan jy dit versier deur 'n ekstra bietjie sjokolade met die vurk op die bokant van 'n truffle te sit en dan dadelik jou versiersel op te sit. Jy kan neute, klapper, versiersuiker of enige iets van jou keuse gebruik. Los die sjokolade vir 'n uur om behoorlik te stol en gebruik handskoene om dit te hanteer as jy regtig moet sodat jy nie jou vingerafdrukke daarop los nie.

Stoor dit in 'n lugdigte houer en geniet!

Biltong-en-cheddarkaas quiche…die perfekte rugby-ontbyt!

Ek is so lief daarvoor om Suid-Afrikaans te wees, en een van my gunsteling dinge daarvan is ons rugbygees...dit is nou natuurlik naas ons taal en ons boerseuns (hiehiehie)!! Probeer bietjie hierdie quiche vir volgende naweek se rugby, dit sal beslis 'n gunsteling word!

BESTANDDELE:

1 x 400g-vel broskorsdeeg
100g cheddarkaas, grofgerasper
160g gesnyde beesbiltong (Klam biltong werk die beste)
2 eiers
250ml room
Varsgemaalde swartpeper na smaak

METODE:

Verhit die oond tot 180 °C. Rol die broskorsdeeg op ’n meelbestrooide oppervlak dunner uit en voer ’n gesmeerde tertbord van sowat 18 cm daarmee uit. Sprinkel die kaas onderin die tertbak en rangskik biltong bo-op. Klits die eiers en room saam in ‘n mengbak en gooi dit oor die kaas en biltong. Geur dit met ‘n bietjie met peper na ju smaak. Bak dit vir sowat 35 minute, totdat die eiermengsel gestol het. Jy kan die quiche warm of teen kamertemperatuur voorsit.

Kry die oorspronklike resep op Sarie se webblad.

Gebakte appel tjips

April het aangebreek! As jy hierdie jaar soos ek baie hard probeer dat die aaklige winter jeans nie weer so knyp nie is hierdie idee vir jou!  Hierdie tjips is vreeslik lekker en die ideale pauselhappie as jy lus raak vir iets lekker. Ek moes dit nou al meer as een keer hierdie naweek vir ons maak. Ek sal voorstel dat jy Top Red of Golden Delicious appels gebruik vir hierdie resep.

Bestanddele:

Appels (een per persoon)

Metode:

Ontpit al jou appels en sny dit in baie dun ronde skyfies, so ongeveer 2mm dik. Plaas bakpapier op ‘n groot bakplaat en plaas die appel skyfies op die papier neer. Moenie dat jou skyfies oorvleuel nie.

Plaas die bakplaat in die oond en bak die skyfies vir een uur by 90⁰C, waarna jy dit omdraai en vir ‘n verdere uur bak. Haal dit uit die oond, laat dit effens afkoel en geniet!

Stoor hierdie tjips in ‘n lugdigte houer. (Dit is nou as jy dit nie sommer dadelik op eet nie!!)

Paaseiers met kaaskoekvulsel

Hierdie resep lewer ongeveer 8 paaseiers en is die ideale paasfees bederf wat jy binne 'n uur kan voorberei en bedien. Ek het die hol paaseiers sommer by Woolworths gekoop. Die lemon curd kry jy by jou plaaslike supermark te koop, maar as jy kans sien kan jy gerus die resep probeer wat ek vir my Klein Lemon Meringue kaaskoekies gebruik het...ek belowe jy sal die spyt wees nie.

Bestanddele:

8 hol sjokolade paaseiers, ongeveer 4x6cm
150g roomkaas
¼ koppie versiersuiker, gesif
½ teelepel suurlemoensap
½ teelepel vanieljegeursel
125ml (½ koppie) room

Metode:

Gebruik 'n mes om versigtig die bokante van die sjokolade eiers te verwyder. As jy dit netjies wil laat lyk sal dit help as jy die mes vooraf met warm water verhit. Plaas dan die doppe in die yskas om koel te bly terwyl jy die vulsel voorberei. 
Klop die roomkaas. versiersuiker, suurlemoensap en vanieljegeursel saam in 'n elektriese mengbak teen hoë spoed vir 3-4 minute en laat eenkant. Klop nou die room in 'n aparte bak styf en vou dit daarna by die roomkaas mengsel in. 
Vul nou elke eiertjie met vulsel en plaas dit in die yskas vir ten minste 'n halfuur om te stol.
Wanneer die vulsel reg is, skep 'n klein holtetjie van ongeveer 1 cm diep in elke eiertjie se vulsel. Vul dan die holtetjie met lemon curd en bedien

Hierdie eiertjies kan 2-3 dae voor die tyd reeds gemaak word en in 'n lugdigte houer in die yskas gestoor word. 

Paasfees kolwyntjies

Kolwyntjies met dié lekkerste malvalekker versiersel...

Paastyd is een van my gunsteling tye van die jaar! Hierdie tyd is gevul met die reuk van vars hot cross buns wat in die huis hang, bokse en bokse vol paaseiers en kerkdienste waar my ma uiteindelik die geleentheid kry om Houtkruis uit volle bors te sing sonder dat iemand vir haar staar.

Hierdie jaar wou ek graag Paastyd gebruik om iets doen om bietjie terug te gee aan die gemeenskap. Ek het besluit om hierdie kolwyntjies te bak vir ons plaaslike ouetehuis. Hierdie is ‘n nuwe versiersel resep wat ek probeer het en ek is MAL daaroor. Ek was nog nooit lief vir swaar versiersuiker nie, so hierdie lig en romerige versiering is volgens my die perfekte afronding vir enige kolwyntjie en defnitief iets om te onthou.

Bestanddele:

1 boks kolwyntjiemengsel (sjokolade of vanilla)

2 eierwitte

½ koppie suiker

1 knippie sout

½ teelepel vanieljegeursel

1 donkersjokolade blok

2 klein pakkies Speckled Eggs

Metode:

Ek het so bietjie gekroek met die resep en sommer ‘ n boks aanmaak kolwyntjiemengsel gekoop. Volg die instruksies op die boks en laat die kolwyntjies eenkant om aft e koel.

Trek ‘n skinkbord met waspapier oor. Smelt die donkersjokolade in die mikrogolfoond en gebruik ‘n mes om die sjokolade in strepe oor mekaar te laat loop op die waspapier. Trek die strepe in verskillende rigtings en bo-oor mekaar sodat dit ‘n web vorm. Plaas die skinkbord in die yskas sodat die sjokolade kan stol.

Versiersel: 

Klits die eierwitte, suiker en sout oor matige hitte in ‘n dubbelkoker tot die suiker gesmelt het. (Dit neem so ongeveer 5 minute). Plaas nou die mengsel in ‘n elektriese mengbak en klits dit teen hoë spoed vir ongeveer 3 minute. Voeg die vanieljegeursel by terwyl jy klits.

Verdeel die versiersel tussen die kolwyntjies en versprei dit mooi. Breek nou van die gesmelte sjokolade af en plaas dit op die kolwyntjie om ‘n nessie te vorm. Rond dit af deur drie Speckled Eggs op elke nessie te plaas. 

Paashaas servette

Hierdie is 'n interessante manier om jou servette te vou om jou Paasfees tafel so bietjie op te kikker.

Stap 1:

Lê 'n groot lapservet op 'n plat oppervlak neer.

Stap 2:

Vou die servet in die helfte sodat die onderste hoekies die boonstes ontmoet.

Stap 3:

Herhaal stap drie deur die servet vir 'n tweede keer in die helfte te vou.

Stap 4:

Neem die twee boonste punte en vou hulle oor teen 'n hoek van 90⁰ soos hier onder aangedui.

Stap 5:

Vou nou die onderste. buitenste hoekies na binne.

Stap 6:

Neem die buitenste hoekies van die servet en vou hulle oor sodat die servet die vorm van 'n vlieër aanneem.

Stap 7:

Draai die servet om.

Stap 8:

Vou die onderste punt van die servet na bo.

Stap 9: 

Vou die onderpunte van die servet om sodat dit kan staan. Ek het sommer 'n paperclip gebruik om die servet in plek te hou.

Dodelike sjokolade kaaskoek met Bar-One ganache

Hierdie drie-sjokolade kaaskoek is die oorsaak dat my jeans bietjie stywer gesit het die afgelope maand...maar dit was heeltemal die moeitewerd! Hierdie is een van Sarie Kos se resepte wat ek so bietjie my eie gaan maak het. Dit lewer een kaaskoek van 25cm.

Bestanddele:

Kors:
200g Romany Creams beskuitjies
100g botter, gesmelt

Vulsel:
250ml room
100g 70%-donkersjokolade, fyngekap
100g melksjokolade, fyngekap
100g witsjokolade, fyngekap
750g roomkaas
1 blik (385g) kondensmelk
125ml strooisuiker
2 eiers
10ml vlapoeier

Ganache:
4x 55g Bar-One sjokoladestafies
100ml room

Metode:

Verhit die oond tot 160⁰C en spuit 'n 25cm losboom koekpan met kossproei. Kap die koekies fyn en meng die gesmelte botter in. Voer die bodem van die koekpan met die koekiemengsel uit en druk dit stewig vas. Plaas nou die pan in die yskas tot dit later weer benodig word.
Plaas die gekapte sjokolade in drie aparte bakke. Verhit die room tot kookpunt op die stoof. Verdeel nou die room tussen die drie bakke (sowat 80ml elk) en roer dit deur tot die sjokolade smelt. Laat dit dan eenkant om af te koel. 
Klits die roomkaas, kondensmelk, suiker, eiers en vlapoeier in 'n elektriese mengbak tot lig en romerig. Verdeel dit dan ook tussen jou drie sjokolade mengsels en meng dit goed.
Haal nou die koekpan weer uit die yskas. Gooi die donkersjokolade mengsel eerste in die koekpan, gevolg deur die witsjokolade mengsel en daarna die melksjokolade mengsel. Gooi die mengsels mooi in die middel van die pan sodat dit van daar versprei.
Bak dit vir 40 minute waarna jy die oond se temperatuur na 120⁰C kan verminder. Bak dit dan vir 'n verdere uur. Skakel die oond af en laat dit afkoel in die oond. 
Smelt die Bar-One stafies en die room saam oor lae hitte en roer dit gedurig. Laat dit afkoel totdat dit 'n dik sous vorm. Skep nou die mengsel oor die kaaskoek en verkoel dit oornag in die yskas. Verwyder die ring van die koekpan en graneer met sjokoladeskerwe en framboos.

Wenk: Hierdie kaaskoek word al hoe lekkerder hoe langer hy in die yskas staan. 

Potjiekos

Ons het gister ons jaarlike Pot&Pons gehad by die koshuis. Huis Onderstepoort sn sluit in ‘n baie fun dag van swem, water slides, lekker musiek en potjie bou terwyl jy aan ‘n (baie sterk) glasie pons sluk. Dit is een van die lekkerste dae van die jaar!

Hierdie jaar was dit my beurt om ons pot te bou, en ek is ongelooflik trots om te sê dat ek dit op my eie bemeester het. Ja, sonder die hulp van ‘n man!

Aangesien ek nog nooit voorheen ‘n potjie gemaak het nie het my pa my verlede naweek geleer. Ek moes notas maak, die bestanddele versigtig saam hom afmeet, die stappe so paar keer van voor tot agter aan hom terugsê voor ek kon ry en gister elke nou en dan ‘n foto stuur om terug te rapporteer. Dit was duidelik dat ek by die beste geleer het want die potjie was ‘n groot sukses. Ek deel graag dan nou met julle my pa se resep. My pa se grootste geheim is om geen water by die pot te gooi nie.

Bestanddele: (Genoeg vir 10 mense)

15 ml kookolie

1½ ui, fyngekap

½ greenpepper

50 ml olyfolie

80 g botter

1t borrie

4 eetlepels mild kerriepoeier

3 kg skaapskenkels

Sout en peper

Groente van eie keuse

6 eetlepels Chutney

6 eetlepels tamatiesous

3 eetlepels worchestersous

500 ml room

1 pakkie Dennie Bacon and Mushroom sous

Metode:

Smeer die binnekant van ‘n nommer 4 pot met kookolie uit. Plaas die pot oor die kole en los hom vir so ongeveer 15 minute om behoorlik warm te raak. Dit is belangrik dat jy baie warm kole hier moet gebruik. Sodra die pot die regte temperatuur bereik het moet jy die olyfolie en botter ingooi en die botter toelaat om te smelt. Braai nou die uie en greenpepper in die olie tot sag. Voeg die borrie en kerriepoeier by en roer dit goed deur. Nou kan jy jou vleis in die pot gooi. Plaas ‘n paar droë takkies onder die pot om vlammetjies te maak omdat jou pot nou goed warm moet wees. Meng die vleis met die uie en braai dit sodat die vleis net mooi bruin verkleur. Haal nou dadelik baie van die kole onder die pot uit sodat die vleis nie aanbrand nie. Jy wil omtrent 4 kole onder jou pot hou sodat dit stadig kook. Plaas nou die deksel op die pot en wag so ongeveer 20 minute voordat jy die eerste keer weer kyk. Roer die vleis stadig deur, maak seker dit brand nie, en voeg nou sout en peper by na smaak. Jou vleis behoort nou al sy eie sousie begin maak het, as dit nie het nie beteken dit nou kole is te warm. Net as dit ‘n noodgeval is kan jy nou ‘n halwe koppie water byvoeg...maar NET as dit ‘n noodgeval is! Plaas nou weer die deksel op en los die vleis vir nog ‘n uur om sag te word. Loer so elke 20 minute net om die temperatuur van jou kole te monitor. 

Nou kan jy jou groente in lae in die pot pak. Pak die groente wat die langste vat om sag te word eerste in. Maak die pot toe en los dit vir ‘n uur om sag te word, weereens moet jy jou kole monitor. Toets ook so een of twee keer of jy genoeg sout in die pot het. Wanneer alles in jou pot sag gekook het kan  jy jou ‘toorgoed’ (soos wat my pa dit noem) bygooi. Dit sluit in al die lekker goed soos die worchestersous, tamatiesous, chutney, room en mushroom sous. Roer nou jou pot versigtig deur. Sit die deksel op sodat die pot vir ‘n verdere 15 minute kan kook en begin almal nader roep om te kom eet. 

Nutella kaaskoek mousse koppies

Bestanddele

 200 g melksjokolade

120 ml roomkaas

½ koppie strooisuiker

⅔ koppie Nutella

½ teelepel vanieljegeursel

1 houer (250ml) Orley Whip

Metode

Gebruik foelie muffin houertjies om die sjokolade koppies te vorm. In ‘n dubbelkoker, laat die melksjokolade smelt. Voer nou elke houertjie met ‘n dun lagie sjokolade uit en laat dit stol voor jy die volgende laag byvoeg. Plaas die koppies in die yskas.

Klop die roomkaas in ‘n elektriese mengbak tot sag. Voeg die strooisuiker, Nutella en vanielje by tot die mengsel glad is. Klop nou die Orley Whip in ‘n aparte bak styf en vou dit dan by die Nutella mengsel in.

Vul nou elke sjokolade koppie met mousse. Plaas dit in die yskas vir ongeveer een uur sodat die mousse kan stol. Neem nou ‘n donkersjokolade en maak skaafsels deur met ‘n aartappelskillertjie daaroor te trek. Haal die koppies uit die yskas, haal dit versigtig uit die foelie en versier met sjokolade  skaafsels.

Sjokoladekoek vir 'n koshuiskind

Ek is terug op Onderstepoort en my vierdejaar is alreeds goed aan die gang. Ek is so opgewonde om terug te wees. My dae bestaan nou grootliks uit klasdraf, leer en aande uithelp met die klein vulletjies in die hospitaal. Ek bly nou al vir al vier jaar van my studies in die koshuis, en vir vier jaar leef ek al van Woolworths se mikrogolf macaroni, Ma se kosblikkies vol huiskos en die koshuis se aaklige hoenderborsies en rys. So vir die volgende paar weke gaan ek ‘n paar mikrogolf resepte uittoets vir die koshuiskamer. Die eerste is ‘n Nutella sjokoladekoek in ‘n koppie. Dit is die perfekte bederf vir die laat aande agter die boeke.

Bestanddele:

4 eetlepels suiker

4 eetlepels bruismeel

3 eetlepels kakao

3 eetlepels melk

3 eetlepels kookolie

3 eetlepels Nutella

1 eier

Metode:

Meng al die bestanddele bymekaar in ‘n koppie. Maak seker dat jou koppie nie te klein is nie, anders gaan die mengsel oorloop in die mikrogolf. Plaas dit vir 1½ minuut in die mikrogolf en geniet! So maklik soos dit!